Poesía n'asturianu

Ye persabío que la pallabra “POESÍA” produz nos más de los escolinos efeutos secundarios de distinta triba: somnolencia, ansiedá, alloriamientu, voltura…y otros munchos que nun vien al casu numberar equí. Sicasí, una ye sabedora de que nun se pue dexar de tomar un tratamientu por mieu a los efeutos dañibles qu’ésti puea tener. Asina que, aprovechando l’ofrecimientu de collaboración de Miguel Rojo en dalguna actividá d’asturianu, propúnxe-y facer un taller de poemes colos escolinos de Llingua asturiana de 1u ESO y de 1u Bachilleratu, a los que s’amestaron los escolinos de 3u de Diversificación. Y asina se fixo.

L’actividá pensóse pa responder a dos fines: averar a los escolinos a la poesía d’anguaño y facer que los alumnos calzaren los zapatos del poeta. Pa ello, escoyimos dalgunos poemes d’autores como Xuan Bello, Berta Piñán o el mesmu Miguel Rojo y, por pareyes, comentámoslos en clase. Cada pareya alixó’l testu que más-y prestó y, entós, entamamos a trabayar sobre él. Tratábase de construyir un poema de creación propia a partir d’ún yá esistente y paeciónos que la biblioteca yera’l llugar más afayadizu pa esta actividá.

Poro, apurrimos-yos a los chavales los poemes mencionaos, pero ensin los versos pares, qu’ellos teníen que crear. Fecho esto, quédaben-yos los versos impares, asina que copiaron los sos versos n’otra fueya y, sobre ellos, completaron la so obra.

Ye de siñalar que toos y caún de los mozos que participaron fixéronlo de mui bon grau y teo confesar que los resultaos fueron enforma meyores de lo qu’esperábemos. En resumen, que mos dexaron ablucaos.

Pa finar esta actividá, l’equipu de biblioteca, xunto con Miguel Rojo y yo mesma, actuó como xuráu y escoyó’l meyor poema de caún de los cursos participantes.

Los resultaos d’esti trabayu puen vese na biblioteca del centru.

Gemma Cueto


1 comentario: